Йæ цардæй ахицæн Цæгат Ирыстоны паддзахадон университеты профессор Тедтойты Зинаидæ

Йæ цардæй ахицæн Цæгат Ирыстоны паддзахадон университеты профессор, республикæйы ахуырады сгуыхт кусæг, педагогон наукæты кандидат Тедтойты Зинаидæ. 50 азæй фылдæр фæкуыста ахуырады къабазы. Зæгъæн ис, æмæ йæхи снывонд кодта йæ уарзон дæсныйадæн. Тедтойты Зинаидæ дæргъвæтин рæстæг разамынд лæвæрдта Цæгат Ирыстоны паддзахадон университеты журналистикæйы факультетæн. Ныртæккæ йæ рауагъдонтæ кусынц канд республикæйы нæ, фæлæ æгас бæстæйы дæр. Æгæронæй уарзта йæ студентты.

Æнæвгъауæй сын лæвæр кодта канд зонындзинæдтæ нæ, фæлæ ма сæ æвæрдта раст фæндагыл дæр. Кæд хъæддых æмæ домаг ахуыргæнæг уыд, уæддæр алы студентæн дæр уыд æцæг хæлар, йæ зæрдæйы хъарм никæмæн æвгъау кодта. Уæлдай ныхасы аккаг сты йæ тæлмацтæ.

Уырыссаг классикты сфæлдыстад тæлмац кодта ирон æвзагмæ. Тургеневы райгуырды 200 азы бонмæ та йын Тедтойты Зинаидæ бацæттæ кодта йæ уацмысты æмбырдгонд ирон æвзагыл. Æрæмбырд ма кодта Толстой, Лермонтов, Гоголь, Некрасов, Чехов æмæ æндæр фысджыты уацмысты тæлмацтæ дæр. 2021-æм азы фæлтæрдджын педагогæн саккаг кодтой Ирыстоны намысы майдан. Тедтойты Зинаидæйы ном, æнæмæнг, цæрдзæн йæ студенттæ æмæ йе `мкусджыты зæрдæты.

#irystontv #Осетия #Алания #ОбществоОсетии #итв_общество #ОсетияИрыстон #НовостиОсетии #Ossetia #alania