Хицауады хæдзары æрдзырдтой промышленнон продукцийы æнæзакъон зилдухы ныхмæ мадзæлттыл

Промышленнон продукцийы æнæзакъон зилдухы ныхмæ къамисы æмбырд ацыд Дзæуджыхъæуы, премьер Дзнайты Барисы разамындæй. Æмбырды ныхас цыд республикæмæ цы хойрæгтæ ласынц, уыдоны мониторингыл. Ветеринарон æмæ фитосанитарон федералон службæйы Цæгат Кавказы регионты ‘хсæн управленийы разамонæджы хæдивæг Дмитрий Меркулов бæлвырд радзырдта бæрæггæнæнтæ. Афтæмæй, 2022-æм азы æхсыры куыстгæнæг 2 куыстуаты уагътой æдасдзинады домæнтæ дзуапп чи нæ лæвæрдта, ахæм продукци. Иваргонд æрцыдысты административон æгъдауæй.

Цæстдар цæуы ветиринарийы къабазмæ дæр. Домæнтæ кæй не ‘ххæст кодтой, уый тыххæй бæрнон куыстуат рафыста 3 административон хъуыддаджы. Дзанайты Барис бабар кодта дзуаппдæттæг министрадтæн уавæрмæ бæстонæй æркæсын.

Æмбырды ма ныхас цыд контрафактон фармацевтон продукцийыл дæр. Æнæниздзинад хъахъхъæнынады министр Тебиаты Сосланы ныхæстæм гæсгæ, адæмы ахæм хостæй бахъахъхъæныны тыххæй æххæстгонд цæуы хосты маркировкæ. Уæвгæ, абоны бонмæ федералон информацион системæ «Маркировка»-йы регистрацигонд ис 520 архайæджы Цæгат Ирыстонæй. Ахæм куысты руаджы маркировкæгондæй республикæмæ æрбаластой 27 милуан хосы.