Цæгат Ирыстоны 2021-æм азæй фæстæмæ æнтысджынæй кусынц бынативгæ фелсырон-акушерон пункттæ

Бынаты æххæст диспансеризаци ацæуын æмæ уайтагъд медицинон иртæстыты хатдзæгтæ базонын. Советскийы хъæуы цæрджытæн бынативгæ медицинон пункт тынг æххуыс у. Бирæ адæм дзы нæ цæры, фæлæ сæ фылдæр сты пенсиисджытæ. Цыколайы центрон поликлиникæ бабæрæг кæнын сын æнцон нæу. Æхсæнадон транспорт хъæумæ æвзæр цæуы. Уымæ гæсгæ та радон хатт фелсырон-акушерон пункты цур рады бирæ адæм ис.
Кæд бынативгæ фелсырон-акушерон пункт чысыл у, уæддæр дзы ис æппæт хъæугæ медицинон кусæнгæрзтæ. Ам адæм исынц хæрзхъæд медицинон лæггæдтæ, уыимæ тагъд. Туджы анализы хатдзæгтæ базонын, кæнæ кардиограммæ скæнын ам ис экспресс лæггæдты руаджы. Нырыккон кусæнгæрзты фæрцы уыцы хъуыддаг æнцон у.
Цæгат Ирыстоны бынативгæ фелсырон-акушерон пункттæ кусын райдыдтой 2021-æм азы кæрон æмæ тынг хъæугæ кæй сты, уый ныридæгæн бæрæг у. Уæлдайдæр та хæххон бынæтты. Æрмæст ацы азмæ специалисттæ уыдысты 10 дæрддзæф хъæуы. Ныртæккæ мобилон бригады хыгъды ис 5 адæймаджы - дохтыр-лаборант, кардиолог, терапевт æмæ невролог.
"Мобилон къорд бæлвырд æркаст саразы пациенттæн. Уый у диспансеризацийы фыццаг къæпхæн. Сæ низы хъæд сын базонæм, сæ туджы æлхъывдад сын сбарæм, сбæрæг сын кæнæм сæ гемоглабин æмæ халестерины бæрц æмæ афтæ дарддæр".
Республикæйы районты ныртæккæ медицинон лæггæдтæ цæрджытæн кæнынц 11 бынативгæ комплексы. Уыдон самал кодтой "Æнæниздзинадхъахъхъæнынад"-ы национ проекты фæлгæты.